شعر:فريدة موسي
الوطن رغيف أليف
ضحكة ف الديسكو بترقص
جته راقده ع الرصيف
كلمتين هرى يا وطنى
مش دليل انك شريف
قالوا وسمعنا حكايات الجرايد
مين حرامى ومين عفيف
مين واخدها ف حضنه نحته
مين غرامها ف دمه كيف
الوطن حفلة أغانى
والمواطن فيها ضيف
المؤلف رش سُكر
الملحن قام يضيف
المغنى صرخ ولعلع
وانت رديت م الكنيف
أيوه أيوه قول كمان
الله عليك فنان حصيف
تطبخ القرع بقشره انت والله أحلى شيف
الوطن طفح جنونكم
جبته لدماغه الخفيف
الخيانه ما الخيانه
الخيانه كل زيف
كل كلمة كل فعل
ع الرقاب للظلم سيف
كلنا مسؤل يا صاحبى
مخنا مبقاش نضيف
لما ع الفاضيه نزعق
واما ف الحق نهيف
الوطن يا عزيزى فعلك
ف المراية يا كفيف
بص حقق .. أيوه دقق
وشك الحلو اللطيف !!
